Մարկ Բլոկ

Ֆրանսիացի պատմաբան Մարկ Բլոկը ծնվել է Լիոնում 1886թ. հուլիսի 6-ին: Հայրը` Գյուստավ Բլոկը, իր ժամանակի անտիկ պատմության հայտնի պրոֆեսոր էր: Մ. Բլոկը բազմիցս նշել է իր վրա հոր բարերար ազդեցության մասին: Միջնակարգ կրթությունն ստացել է Փարիզում` Լյուդովիկոս Մեծի լիցեյում: Այնուհետև (1904թ.) փոխադրվել է Բարձրագույն մանկավարժական դպրոց (ինստիտուտ):

1908 թվականին պատմության և աշխարհագրության դասավանդման իրավունք է ստանում Լայպցիգում, այնուհետև Բեռլինում (1908-1909թթ.): 1912 թվականին դասավանդում է Մոնպելյեի և Ամյենի լիցեյներում: 1913 թվականին հրատարակում է իր առաջին գիրքը:

Առաջին աշխարհամարտի սկսվելուն պես բանակ է զորակոչվում: Ծառայության ժամանակ արժանանում է բազմաթիվ պարգևների: Զորացրվելուց անմիջապես հետո հրավիրվում է Ստրասբուրգ` դասախոսելու: Այստեղ էլ պաշտպանում է դոկտորական ատենախոսություն: Ծանոթանում է Լ. Ֆևրի հետ:

1936 թվականին նա արդեն տնտեսության պատմության պրոֆեսոր էր Ստրասբուրգում: 1936-1938 թվականներին ակտիվ մասնակցում է Ազգային ճակատի գործողություններին: Ավելի ուշ միանում է Ֆրանսիայում կրթական բարեփոխումներ ծրագրերին:

1939 թվականի օգոստոսին կրկին զորակոչվում է բանակ: Հընթացս գրում է «Տարօրինակ պարտություն» գիրքը (հրատարակվում է հետմահու` 1946թ.): Այս ժամանակ որոշակի հակասություններ են ծագում Լ. Ֆևրի և Մ. Բլոկի միջև:

Մասնավորապես, երբ Մ. Բլոկի հրեա լինելու պատճառով ամսագիրը փակվելու վտանգի տակ էր դրված. Լ. Ֆևրը Բլոկին առաջարկում է հանդես գալ կեղծանունով, ինչին դեմ էր Բլոկը: Շուտով, սակայն, համաձայնության է գալիս և սկսում է տպագրվել կեղծանունով: 1941-1942 թվականներին աշխատում է իր ծրագրային հետազոտության վրա:

1944 թվականին ձերբակալվում է գեստապոյականների կողմից: Գերության մեջ էլ չի դադարեցնում իր գիտական գործունեությունը` Լ. Ֆևրին է մաս-մաս ուղարկելով նյութեր և մի շարք հոդվածներ: 1944 թվականին հուլիսի 16-ին գնդակահարվում է Լիոնից ոչ հեռու: